​តាកែវ​៖ នៅ​សាល​សហ​សិក្សា​មជ្ឈមណ្ឌល​គរុកោសល្យ​ភូមិភាគ​តាកែវ ថ្ងៃទី​០៩ ខែតុលា ឆ្នាំ​២០១៥ បានរៀបចំ​ការប្រឡង​ជ្រើសរើស​ជ័យលាភី​អាហារូបករណ៍​ឆ្នាំ​២០១៥ ចំនួន​៣៤០​កន្លែង ក្នុងនោះ ថ្នាក់​បរិញ្ញាបត្រ​ចំនួន ២៩៥​កន្លែង និង​ថ្នាក់​បរិញ្ញាបត្ររង​ចំនួន ៤៥​កន្លែង ។​

​ពិធី​នេះ​មានការ​អញ្ជើញ​ចូលរួម​ពី​សំណាក់ ឯកឧត្តម សុខ ផេង រដ្ឋលេខាធិការ​ក្រសួងសុខាភិបាល ឯកឧត្តម ស៊ូ ភិរិន្ទ រដ្ឋលេខាធិការ​ទីស្តីការគណៈរដ្ឋមន្ត្រី និង​ជា​ប្រធាន​ក្រុមការងារ​សេនាធិការ​នៃ​ក្រុមការងារ​ថ្នាក់ជាតិ​ចុះ​មូលដ្ឋាន​ខេត្តតាកែវ ឯកឧត្តម សុខ សូ​កាន អ្នកតំណាងរាស្ត្រ​មណ្ឌល​តាកែវ ឯកឧត្តម ស្រី បេន ប្រធាន​ក្រុមប្រឹក្សា​ខេត្តតាកែវ និង​ឯកឧត្តម ឡាយ វណ្ណៈ អភិបាល​នៃ​គណៈ​អភិបាល​ខេត្តតាកែវ  ក្រោម​អធិបតីភាព​ឯកឧត្តម​បណ្ឌិត​សភាចា​រ្យ សុខ អាន ឧបនាយករដ្ឋមន្ត្រី រដ្ឋមន្ត្រី​ទទួលបន្ទុក​ទីស្តីការគណៈរដ្ឋមន្ត្រី និង លោកជំទាវ ។​

​ក្នុងឱកាស​នេះដែរ ឯកឧត្តម សុខ ផេង បាន​មានប្រសាសន៍​សំណេះសំណាល​ជាមួយ​បេក្ខជន​ប្រឡង និង​បានធ្វើ​ការណែនាំ ផ្ដាំផ្ញើ​លើកទឹកចិត្ត ព្រមទាំង​បាន​បើក​នូវ​ហិប​វិញ្ញាសា​ដើម្បី​ដាក់ឱ្យ​ដំណើរការ​នៃ​ការប្រឡង​នេះ​ផងដែរ​។

​សូមបញ្ជាក់​ផងដែរ​ថា ការប្រឡង​អាហារូបករណ៍​នេះ មាន​បេក្ខជន​ចូលរួម​ប្រកួតប្រជែង​សរុប​ចំនួន ៨៥១​នាក់ ក្នុងនោះ​ស្រី​ចំនួន ៣៨៧​នាក់​៕

​ប្រភព​៖ ទំព័រ សស​យក ខេត្តតាកែវ​